ރިހެބިލިޓޭޝަން ޕްރޮގްރާމުގައި ބައިވެރިވާ ގައިދީންގެ ޖަލު ހުކުމުން އިތުރު ދުވަހެއް އުނިވެގެންދާ ގޮތަށް ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.
"ދިވެހި ސަގާފީ ގޯތި" ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ ރިހިބިލިޓޭޝަން ޕްރޮގްރާމުގައި ބައިވެރިވާ ކޮންމެ ގައިދީއެއްގެ ޖަލުގެ ހުކުމުން އިތުރު އެއް ދުވަސް އިތުރަށް ކެންޑިގެންދާ ގޮތަށް ހަމަޖެއްސުމަކީ ރައީސްގެ ސިޔާސަތެއް ކަމަށެވެ. އަދި ޤާނޫނުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނެސް ހަރުދަނާ ގޮތެއްގައި އެކަން ކުރެވޭނެ އުސޫލުތަކެއް ކަރެކްޝަނަލް ސާވިސްއިން ވަރަށް އަވަހަށް ގައިދީންނަށް އިއުލާންކުރާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ގައިދީންނަކީ ހަމައެކަނި "ތޭރިތަކުގައި ބަންދުކޮށްގެން" ގެންގުޅޭ ބަޔަކަށް ހެދުމަކީ ވިސްނުމެއް ނޫން ކަމަށާއި އޭގެ ބަދަލުގައި ސަރުކާރުން ނިންމާފައި ވަނީ، މުޖުތަމައަށް އަނބުރާ އެ ގައިދީން ނުކުންނަން ވާއިރަށް މަސައްކަތްތެރި އަދި އުފެއްދުންތެރި ބަޔަކަށް ހެދުން ކަމަށެވެ.
ގައިދީން ބޭނުން ދާއިރާއަކުން މަސައްކަތުގެ ތަޖުރިބާ ހޯދަން، ރިހެބިލިޓޭޝަން ޕްރޮގްރާމްގައި ބައިވެރިވެވޭނެ ކަމަށްވެސް މިނިސްޓަރ ވިދާޅުވިއެވެ.
"ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ އައު ސިޔާސަތެއް އެއީ، ގައިދީންގެ ތެރެއިން ރިހެބިލިޓޭޝަން ޕްރޮގްރާމްގައި ބައިވެރިވާ ކޮންމެ ގައިދީއަކީ، އެ މީހާ ކޮންމެ ދާއިރާއަކުން ވިޔަސް މަސައްކަތް އުނގެނުމަށް މަސައްކަތްކުރާ ކޮންމެ ދުވަހަކީ ޖަލު ހުކުމުން އެއް ދުވަސް ކެނޑޭނެ ދުވަހެއްގެ ގޮތުގައި ހަމަޖެއްސެވުން. ދާޚިލީ ވަޒީރު"
ރިހެބްލިޓޭޝަންގައި މަސައްކަތް ކުރާނަމަ މަސައްކަތް ކުރި ދުވަހުގެ އިތުރަށް ޖަލު ހުކުމުން އެއް ދުވަސް އުނިވާ ގޮތަށް ސިޔާސަތު ބަދަލު ކުރަން މަސައްކަތް ކުރައްވަމުން ގެންދަވާ ކަމަށް މިނިސްޓަރ ވަނީ ވިދާޅުވެފައެވެ.
އަދި ރައީސްގެ ސިޔާސަތަކީ ރަނގަޅު ފަންނުވެރި މަސައްކަތްތަކެއް ދަސްކޮށް، އާމްދަނީ ލިބޭނެ މަގެއް ހޯދައިގެން މުޖުތަމައު އަނބުރާ އަވަހަށް ނިކުމެވޭނެ ބަޔަކަށް ގައިދީން ހެދުން ކަމަށްވެސް މިނިސްޓަރ ވިދާޅުވިއެވެ.