ބިދޭސީން ލައްވާ ޤަވާއިދާ ޚިލާފަށް މަސައްކަތްކުރުވާ ދިވެހިންނާމެދު އިމިގްރޭޝަންގެ ގާނޫނުގެ ދަށުން އެޅެން އޮންނަ ފިޔަވަޅު މިއަދުން ފެށިގެން އަޅަން ފަށާނެ ކަމަށް ދާޚިލީ ސަލާމާތާއި ފަންނިއްޔާތާއިބެހޭ ވަޒީރު ޢަލީ އިޙްސާން ވިދާޅުވެއްޖެއެވެ .
މިނިސްޓަރ މިފަދައިން ވިދާޅުވީ ގަވާއިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް އުފައްދާފައިވާ ޓާސްކްފޯސްގައި ޞިއްޙަތާބެހޭ ވުޒާރާއާއި އިގްތިޞާދީ ތަރައްޤީއާ ބެހޭ ވުޒާރާ ހިމެނުމާ ގުޅިގެން އެޓާސްކް ފޯސްއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
މިނިސްޓަރ ވިދާޅުވީ އިމިގްރޭޝަންގެ ޤާނޫނުގެ ދަށުން އެޅެން އޮންނަ ފިޔަވަޅުތަކުގެ ތެރޭގައި 50,000 ރުފިޔާއާ ހަމައަށް ޖޫރިމަނާކުރުމާއި އެމީހެއްގެ ޕާސްޕޯޓު ހިފެހެއްޓުން ހިމެނޭ ކަމަށެވެ.
މި ނޫސްވެރިންގެ ބައްދަލުވުމުގައި މިނިސްޓަރ ވަނީ ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް މިނިސްޓްރީ އާއި މޯލްޑިވްސް އިމިގްރޭޝަން ގުޅިގެން ކުރިއަށް ގެންދާ މަސައްކަތަށް އިކޮނޮމިކް މިނިސްޓްރީ އާއި މިނިސްޓްރީ އޮފް ހެލްތު ގުޅިގެން އޮޕަރޭޝަން އިތުރަށް ފުޅާކުރުމަށް ނިންމާފައިވާކަން އިއުލާން ކުރައްވާފައެވެ.
މިނިސްޓަރ ވިދާޅުވީ ޓާސްކް ފޯސްގެ މަސައްކަތް ވަރަށް ބާރަށް ހިނގަމުން އައިސް މިހާރު ފާހަގަވި ބައެއް ކަންކަމުގެ އަލީގައި ރައީސުލްޖުމްހޫރިއްޔާގެ އެންގެވުމަށް ޓާސްކް ފޯހުގައި އެކުލެވޭ އިދާރާތަކަށް ބަދަލު ގެނެސްފައިވާ ކަމަށެވެ.
އެ ބަދަލަކީ މޯލްޑިވްސް އިމިގްރޭޝަނާއި ފުލުހުންގެ އިތުރުން މިނިސްޓްރީ އޮފް ހެލްތުގެ ދަށުން ހެލްތް ޕްރޮޓެކްޝަން އެޖެންސީ އަދި ފުޑް އެންޑް ޑްރަގް އޮތޯރިޓީވެސް މި ޓާސްކްފޯސްގެ ތެރެއަށް އިތުރުކުރުން ކަމަށް މިނިސްޓަރ ވިދާޅުވިއެވެ.
އަދި އިކޮނޮމިކް މިނިސްޓްރީގެ ފަރާތުން ވެސް ޓާސްކް ފޯހުގައި ބައިވެރިވުން ކަމަށް މިނިސްޓަރު އިޙްސާން ވަނީ ވިދާޅުވެފައެވެ.