`

ދ. ކުޑަހުވަދޫގައި އައިޑީކާޑު ޕްރިންޓް ކުރުމުގެ ޚިދުމަތް ފެށުމުގެ ރަސްމިއްޔާތުގައި  މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ދެއްކެވި ވާހަކަފުޅު

(05 ނޮވެމްބަރ 2024)

ﷲ ސުބުޙާނަހޫ ވަތަޢާލާއަށް ޙަމްދާ ޝުކުރު ކުރަން. އަޅުގަނޑުމެންގެ މާތް ނަބިއްޔާ މުޙައްމަދު ﷺ އަށް  ޞަލަވާތާއި ސަލާމް ލެއްވުމަށް އެދި ދުޢާކުރަން. މިޞަލަވާތާއި ސަލާމުގައި އެކަލޭގެ ފާނުގެ އާލު އަޞްޙާބުން ޝާމިލުކުރަން.

 މި ރަސްމިއްޔާތުގައި އަޅުގަނޑުމެންނާއެކުގައި ޝަރަފްވެރިކޮށްދެއްވުމުގައި ބައިވެރިވެ ވަޑައިގަންނަވާ ، އަޅުގަނޑުމެންގެ ޢިއްޒަތްތެރި ވަޒީރު އާދަމް ޝަރީފް ޢުމަރު، ކުޑަހުވަދޫ ދާއިރާގެ ޢިއްޒަތްތެރި މެންބަރު ، ދ. އަތޮޅު ކައުންސިލްގެ ރައީސް، އަދި އަތޮޅު ކައުންސިލްގެ އެންމެހާ މެންބަރުން، ޑީއެންއާރު މިވަގުތު ހިންގެވުމާ ހަވާލުވެ ހުންނެވި ހީވާގި ޑެޕިއުޓީ މިނިސްޓަރ އަހްމަދު އާލީ ، އަދި އަޅުގަނޑުމެންގެ ހުރިހާ މުވައްޒަފުން، ވަޑައިގެންތިއްބެވި އެންމެހާ ހާޟިރީން، މިއަތޮޅާ ރަށުގެ ރައްޔިތުން.

السلام عليكم ورحمة الله وبركاته.

އާދެ! މިފަދަ ހަފްލާއެއްގެ އަދި ޚާއްޞަކޮށް ކައުންސިލަކުން ތަޢާރަފްކުރާ ޚިދުމަތެއްގެ، ތަޢާރަފް ކުރުމުގެ ހަފްލާއެއްގައި ކައުންސިލްތަކާބެހޭ ވަޒީރު ވާހަކަ ދެއްކެވުމަށްފަހު އަޅުގަނޑަށް ދައްކާނެ އެއްވެސް ވާހަކައެއްނެތް. ހީއްނުވޭ އެވަރަށް ފުރިހަމައަށް ވާހަކަ ފުޅު ދައްކަވާފަ އަނެއްކޮޅުން ބާކީ ހުރިކަމެއް ވެއްޖެއްޔާމުން އަޅުގަނޑުމެން ޢިއްޒަތްތެރި މެންބަރު އަނެއްކާ ދައްކަވާއިފަ. އެހެންވީމަ އަޅުގަނޑު ހިތަށް އެރީ އެދާއިރާއަށް އެހާވަރަށް ނުގޮސް އެހެންނަމަވެސް މި ފެށިގެން ދިޔަ ޚިދުމަތުގެ ބައެއް ކަހަލަ ކަންކަން އަޅުގަނޑުމެން ހައިލައިޓް ކޮށްލާނަން.

 އަޅުގަނޑު މިވަޒީފާ ހަވާލުވި ހިސާބުން ރައީސުލްޖުމްހޫރިއްޔާ ވަރަށް ކުލިއަރ އިންސްޓްރަކްޝަނެއް އަޅުގަނޑުމެނަށް ދެއްވާފައި އެބައޮތް. އެއީ ދިވެހިރާއްޖޭގެ އައިޑީކާޑުގެ ޚިދުމަތް ރައްޔިތުންނާ ވީހާވެސް ގާތުން ފޯރުކޮށްދެވޭނެ ހުރިހާ މަގެއް ހޯދުމަށް. އަދި ސަލާމަތާ ރައްކާތެރިކަން ކަށަވަރުވާގޮތަށް ރައްޔިތުންގެ މަޢުލޫމާތާ، އަޅުގަނޑުމެން ބަލަހައްޓަމުން ގެންދާ ޒާތީ މަޢުލޫމާތުތައް ރައްކާތެރި ކުރެވޭނެގޮތަށް ، ވީއެންމެއަވަހަށް ޚިދުމަތް ލިބޭނެ ގޮތަށް ރައްޔިތުންނާ އެންމެގާތުން، އެންމެ އުނދަގޫ ކުޑަގޮތަކަށް އެންމެ އަވަހަށް މި ޚިދުމަތް ފޯރު ކޮށްދެވޭނެ ގޮތަތަކެއް ހޯދާށޭ. އެކަމަގަ ހަމަ އަޅުގަނޑު އެބާރުމިނުގަ ހަވާލުކުރިން މިވަގުތު އައިޑީކާޑު ހިންގުން ހަވާލުވެހުރި ޑެޕިއުޓީ މިނިސްޓަރ އާލީއާ އާލީގެ ޓީމަށް.  އަޅުގަނޑު ހަމަ މިވަގުތު ތިޔަ އެންމެ ބޭފުޅުންގެ ހާޟިރުގަ މި ދެބޭފުޅުން ކޮޅަށް ތެދުވެލަން ދަންނަވާލާނަން. ޑެޕިއުޓީ މިނިސްޓަރ އާލީ އަދި އަޅުގަނޑުމެންގެ އައިޓީ ޑިރެކްޓަރ އަދި ޒިންމާދާރުވެރިއާ މުޙައްމަދު އުމޭރު. ކޮޅަށް ތެދުވެލާ. އާދެ! މިދެބޭފުޅުންގެ މަސައްކަތުން އަޅުގަނޑަށް ހިތްހަމަޖެހިގެން މި ޚިދުމަތް ރަށް ރަށުގަ ދޭން ހުއްދަދެވޭ ވަރުވެފަމިއޮތީ. މިފަދަ ޚިދުމަތަކީ ޚާއްޞަކޮށް ކޮންޓްރޯލް ބައެއް އައިޓަމްސްތަކާއެކު. އައިޑީކާޑް ހަދަން ގެންގުޅޭ ސާމާންތަކާ އައިޑީކާޑުގެ ޑޭޓާބޭސް އެވާ އެކްސެސްއާ. އެކްސެސްވެވޭ ސިސްޓަމަށް މިތަނުން އަޅުގަނޑުމެންގެ ކޮންޓްރޯލްއިން ބޭރުގަ ކައުންސިލް އިދާރާގެ ބަހައްޓަން އެއީ ވަރަށް ބޮޑު ޒިންމާއެއް. އަޅުގަނޑުގެ  ބޮލުގައެޅިފައޮތް ގާނޫނީ ބޮޑު ޒިންމާއެއްގެ ތެރެއިން ޑެލިގޭޓްކުރާ އޮތޯރިޓީއެއް ރައީސުލްޖުމްހޫރިއްޔާގެ އެންގެވުމާއެކު. އެކަންމިދެންނެވި ބީދާއިން ޒަމާނީ ޓެކްނޮލޮޖީގެ އެހީގަ ސަލާމަތާއިރައްކާތެރިކަމާއެކު މިކަން ކުރެވޭނެ މަގު ހޯއްދަވާދެއްވީ  މި ދެ ބޭފުޅުން. އެހެންވީމަ މިކަމަށްޓަކައި ތިޔަ އެންމެ ބޭފުޅުންގެ ނަމުގަ މި ދެބޭފުޅުން މި ކުރެއްވި ބުރަ މަސައްކަތަށް  އަޅުގަނޑު ވަރަށް އިޚްލާސްތެރިކަމާއެކީ ޝުކުރު އަދާކުރަން.

 އާދެ! ކައުންސިލްތަކުން މަސައްކަތްތައް ކުރުމުގަ ރައްޔިތުންނާ ގާތުން ޚިދުމަތް ދިނުމުގަ މަސައްކަތް ބައްޓަން ކުރުމަށް ވަރަށް މަސައްކަތްތައް ކުރަމުން ގެންދިޔަ. ފަސޭހަ ކަމެއްނޫން ކައުންސިލްގަ ހުންނަ އާންމުދަނީ ، ނުވަތަ ކައުންސިލަށް ލިބޭ ކުޑަ އާންމުދަނީ ކޮޅު މިފަދަ ބޮޑު ޚަރަދެއް ކުރަން ނިންމެވުމަކީ. އެހެންނަމަވެސް އަޅުގަނޑަށް ގަބޫލުކުރެވޭ ގޮތުގައި ދ. އަތޮޅުކައުންސިލްގެ ރައީސް އަދި މެންބަރުންނަށް ގަބޫލުކުރެވުނު. ރައްޔިތުންނަށް ވަރަށް މުހިންމު މިރަށުން މި އަތޮޅުން ލިބެން ކޮންމެހެން ބޭނުންފުޅުވާ ޚިދުމަތެއްކަމަށް މި ޚިދުމަތަކީ. އެހެންވުމާއެކުގަ ރާއްޖޭގެ ދެވަނަ ކައުސިލަކަށް މިކައުންސިލުން އިސްނަންގަވައިގެން  މިޚަރަދު އަމިއްލަފުޅަށް ކުރައްވައިގެން މިކަން މިކުރައްވަނީ. ހަގީގަތަކީ ގާތްގަނަޑަކަށް މިލިއަނެއްހާ ރުފިޔާ ޚަރަދުވާ މަސައްކަތެއް މިމަސައްކަތަކީ ބޮޑު ޚަރަދެއް މީ ރައްޔިތުންގެ ހައްގުގަ ކުރަން. އަދި  މިއެއްޗެހިތައް މެއިންޓެއިން ކުރުމުގައި ގެންގުޅެންޖެހޭ ކޮންޑިޝަންގައި މެއިންޓެއިން ކުރުމާ، އަޅުގަނޑުމެން މި ކަނޑައަޅާފަހުންނަ ސަލާމަތާ ރައްކާތެރިކަން ކަށަވަރުކުރެވޭނެ މިންގަނޑުތަކަށް މިތަން ބެލެހެއްޓުމަކީވެސް ފަސޭހަކަމެއްނޫން. އެހެންވެގެން އަޅުގަނޑުމެންނަށް އަސްލު ބޭނުންވާ ސްޕީޑުގައި  ހުރިހާ ކައުންސިލަކުން އަދި މިޚިދުމަތް ނުފެއްޓިގެން މިއުޅެނީ. ރައީސް އަޅުގަނޑުމެންނަށް ދެއްވާފައިން އިންސްޓްރަކްޝަނަކީ އެއްއަހަރުތެރޭގައި ކައުންސިލްތަކުން މިމަސައްކަތްތައް ފެށޭނެގޮތް ރާވާލަދޭށޭ. އެހެންނަމަވެސް ކައުންސިލްތަކުގެވެސް އެއްބާރުލުން  ލިބޭ ވަރަކުން އަޅުގަނޑުމެނަށް އެބައޮތް އެހެން ކައުންސިލްތަކުންވެސް ރިކުއެސްޓްކޮށްފަ އަޅުގަނޑުމެން މަސައްކަތްވެސް އެބަކުރަން އެކައުންސިލތައްވެސް ފަށްޓަން. އެހެންނަމަވެސް ރިކުއެސްޓްތައް އަންނަ ތަރުތީބަކުން އަދި އެކައުންސިލެއްގެ ހިތްވަރު ހުރިވަރަކުން މިކަން ކުރެވޭނީ. އެހެންވީމަ އަޅުގަނޑު ހަމަ ވަރަށް ބޮޑަށް ފާހަގަކުރަން މި ކުޑަހުވަދޫ އަށް ނިސްބަތްވާ އަތޮޅުކައުންސިލް އަދި އަތޮޅުކައުންސިލްގެ ރައީސް އަދި ރައީސާއެކު މަސައްކަތް ކުރައްވާޓީމުން އެ ކުރެއްވި ބުރަ މަސައްކަތް އަދި ރައްޔިތުންގެ ހައްގުގައި ތިނެންގެވި އިސްނެންގެވުން އަޅުގަނޑުމެން ފާހަގަކޮށް ވުޒާރާ ނަމުގައި ތިޔަ ކައުންސިލަށް ވަރަށް އިޚްލާޞްތެރިކަމާއެކު ޝުކުރު އަދާކުރަން.

 ޕީއެންސީއަށް ނިސްބަތްވާ އެންމެހާ ރައްޔިތުންގެ މަޖިލިހުގެ މެންބަރުންނަކީ، އަޅުގަނޑަށް ފާހަގަ ކުރެވުނީ އެބޭފުޅުންގެ ދާއިރާގެ ޚިދުމަތްތައް އަވަހަށް ހޯދުމަށް އެދާއިރާގެ ކަންތައް ހައްލު ކުރުމުގައި ވަރަށް އަވަދި ނެތި މަސައްކަތް ކުރައްވާ މެންބަރުންކޮޅެއްގެ ގޮތުގައި.  ޚާއްޞަ ގޮތެއްގައި އަޅުގަނޑު ފާހަގަކުރަން ކުޑަހުވަދޫ ދާއިރާގެ ޢިއްޒަތްތެރި މެންބަރު. އަޅުގަނޑުމެނަށް ގިނަފަހަރަށް ގުޅާލީމަ ބައެއްފަހަރަށް މިސްވެސްވޭ ފޯންކޯލްތައް. އެބޭފުޅުން ގާތުން ބައްލަވާ މިކަންތައްތައް ކުރިއަށް ދާގޮތް. މި ޚިދުމަތް ފެށުމާ އަދި އަޅުގަނޑުމެންގެ ވުޒާރާގެ ދަށުގައި ހުރި އެހެން ޚިދުމަތްތައް މިއަތޮޅުން ކާރިން ލިބޭނެގޮތް އަވަހަށް ހޯއްދެވުމަށް ވަރަށް މަސައްކަތްޕުޅު ކުރައްވާ. އެހެންވީމަ މީގެއިން މިދޭހަކޮށްދެނީ ސަރުކާރަކާއެކު ގުޅިގެން މަސައްކަތްކުރާ މެންބަރުން ކޮޅެއް ތިބުމަކީ ރައްޔިތުންނަށް ކިހާ ފައިދާ ހުރިކަމެކަން .

 ތިޔަ ޢިޒަތްތެރި ލޮބުވެތި ރައްޔިތުން މިއަތޮޅުގައި ރައީސުލްޖުމްހޫރިއްޔާ އެކުގައި މަސައްކަތް ކުރައްވާނެ މެންބަރަކު ހޮއްވަވާފަ ރައްޔިތުންގެ މަޖިލިހަށް ފޮނުއްވި ފޮނުއްވުމަކީ އަޅުގަނޑު ދެކޭ ގޮތުގައި މިއަތޮޅަށް، ތިޔަ ރައްޔިތުންނަށް ޚިދުމަތް ލިބުމުގައި އިތުރު ފަސޭހަތަކެއް އަދި އިތުރު ހިތްވަރެއް ލިބިގެން އަންނާނެކަމެއް. އަދި ރައްޔިތުންގެ ހައްގުގައި ތިކުރައްވާ މަސައްކަތައް ޢިއްޒަތްތެރި މެންބަރަށްވެސް ވަރަށް ބޮޑަށް ޝުކުރު އަދާ ކުރަން.

 އާދެ! އަޅުގަނޑުމެންގެ ދާޚިލީ ސަލާމަތާ ރައްކާތެރިކަން މި ފޯރުކޮށްދޭ ވުޒާރާގެ މަސައްކަތްތައް ކުރިއާ ބަލާފަ ވަރަށް ތަފާތު ގޮތަކަށް މިދައުރުގަ ރޭވިގެން މިއައީ. އެނގި ވަޑައިގަންނަވާނެ ކުރީގެ ހޯމް ނިމިސްޓްރީ އަކީ އާންމުގޮތެއްގަ މިހުންނަ ގިނަ ކަންކަމުގެ އިތުރުން ރާއްޖެގަ ފާހަގަކުރަން ޖެހޭ ރަސްމީ ދުވަސްތައް ފާހަގަކުރުމުގަ ވަރަށް ބޮޑަށް މަސްއޫލުވެގެންއުޅޭ ވުޒާރާއެއް. އެހެންނަމަވެސް އަޅުގަނޑުމެންގެ ޢިއްޒަތްތެރި ރައީސުލްޖުމްހޫރިއްޔާ ނިންމެވީ މިވުޒާރާގެ މައިގަނޑު މަސައްކަތަކަށްވާނީ ދިވެހިރައްޖޭގެ ދާޚިލީ ސަލާމަތާ ރައްކާތެރިކަން ބެލެހެއްޓުންކަމަށް. އެގޮތުން މިވުޒާރާ މިފަހަރު މިއެތުރިފައި މިއޮތް ގޮތަށް ބައްލަވައިފިއްޔާ އެނގި ވަޑައިގަންނަވާނެ ރައީސް މިކަމަށް އިސްކަން ދެއްވާވަރު. ރައްޔިތުންގެ ސަލާމަތަށް، ރައްޔިތުންގެ ތެރޭގައޮތް ބޮޑެތި މައްސަލަތައް ހައްލުކުރެއްވުމަށް ބޭނުންފުޅުވާވަރު. ރާއްޖޭގައި އޮތް ޑުރަގް މައްސަލައެއްކޮށް ހައްލުކުރުމާ، ރައްޖޭގަ ގޭންގުހަދައިގެން ކުށްކުރުން އެއްކޮށް ހައްލުކުރުމާ، ރައްޖޭގައި ގަވާއިދާ ޚިލާފަށް އުޅެމުންދާ  ބިދޭސީންގެ މައްސަލައަށް ދާއިމީ ހައްލެއް ގެނައުމާ، އަދި މުޖުތަމަޢުގަ އުޅޭ ކުށްކުރާ ކުޑަކުދިންނަށް މިކަމުން ސަލާމަތް ވާނެގޮތް ހޯއްދަވައި ދެއްވުމަކީ ރައީސްގެ އެންމެ ބޮޑު ޓާސްކް މިވުޒާރާއާ ހަވާލުކުރެވިފައިވާ. އަޅުގަނޑުމެން މި ބަލަނީ ރައީސް އެދި ވަޑައިގަންނަވާގޮތަށް  އަވަހަށް މިކަންކޮށް ނިންމާ ލެވޭތޯ.  އަޅުގަނޑު ވަރަށް ބޮޑަށް އެދެން ތިޔަ ކައުންސިލްތަކުގެ އެއްބާރުލުން އަޅުގަނޑުމެން މިމަސައްކަތްތައް ކުރާއިރުގަ މި މަސައްކަތައް ފަސޭހަކަމާއެކު  ކުރުމަށްޓަކައި. މިގޮތުން ބިދޭސީންގެ މައްސަލަ ހައްލުކުރުމުގައިވެސް އަޅުގަނޑު ވާނެ ރައްޔިތުންގެ އެހީތެރިކަމަށް އެދިފަ . މަސްތުވާތަކެތީގެ މައްސަލާގަވެސް ފުލުހުންނާ ގުޅިގެން ކައުންސިލްތަކުން އަޅުގަނޑުމެންވާނެ ރައްޔިތުންގެ އެހީ ތެރިކަމަށް އެދިފަ. މިކަންކަން ތިބޭފުޅުން އަވަސް ކޮށްދެއްވި ވަރަކަށް އަޅުގަނޑުމެންނަށް މިމަސައްކަތުގައި ކުރިއެރުން އަވަހަށް ލިބޭނީ. އޭރުން ރައީސުލްޖުމްހޫރިއްޔާ މިއެދިވަޑައިގަންނަވާ ރައްކާތެރި މާހައުލެއް މިރާއްޖޭގައި ގާއިމުކުރެވޭނީ.

 އަދިވެސް އެއްފަހަރު މިޚިދުމަތް ފޯރުކޮށްދެއްވުމުގައި ބައިވެރިވި އެންމެހާ ފަރާއްތަކަށް ވަރަށް އިޚްލާޞް ތެރިކަމާއެކު ޝުކުރު އަދާކުރަން.

ނިންމާލުމުގެ ކުރިން އަޅުގަނޑު ދަންނަވާލަން. މިއަތޮޅުގަ މިރަށުގަ އިރާދަކުރެއްވިއްޔާ ޕާސްޕޯޓް ދޫކުރުމުގެ ޚިދުމަތް، އިމިގްރޭޝަނުން ގާއިމުވެ ތިބެގެން ދެވޭނެ އިންތިޒާމް 17 ނޮވެމްބަރ ގެ ކުރިން އިރާދަ ކުރެއްވިއްޔާ އަޅުގަނޑުމެން ފަށްޓާނަން.

 އަޅުގަނޑު އެދެނީ ރައީސުލްޖުމްހޫރިއްޔާ ދިވެހި ރައްޔިތުންނަށްޓަކައި މިކުރައްވާ ބުރަ މަސައްކަތްޕުޅުގައި ކާމިޔާބީގެ އިތުރު ހަރުފަތްތަކެއް އަޅުގަނޑުމެންނަށް ހާސިލުވެގެން ދިއުން. ރައީސް ދެއްވާ ގައިޑެންސާ އެއްގޮތަށް  އަޅުގަނޑުމެންނަށް ރައްޔިތުންނަށް މިދޭ ޚިދުމަތްތައް އަވަހަށް ޑެލިވަރ ކުރުމުގެ ހެޔޮތަޢުފީޤް މާތް ﷲ ސުބުޙާނަހޫ ވަތަޢާލާ އަޅުގަނޑުމެން އެއްމެނަށް މިންވަރު ކުރައްވާށި.

 ކުރިއަށް ދިވެހި ގައުމު

 والسلام عليكم ورحمة الله وبركاته.