އައްސޭރި ޖަލުގައި ގާއިމުކޮށްފައި މިސްކިތް ހުޅުވުމުގެ ރަސްމިއްޔާތުގ
`
އައްސޭރި ޖަލުގައި ގާއިމުކޮށްފައި މިސްކިތް ހުޅުވުމުގެ ރަސްމިއްޔާތުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ދެއްކެވި ވާހަކަފުޅު
(24 އޮކްޓޫބަރ 2024)
ﷲ ސުބުޙާނަހޫ ވަތަޢާލާއަށް ޙަމްދާ ޝުކުރު ކުރަން. އަޅުގަނޑުމެންގެ މާތް ނަބިއްޔާ މުޙައްމަދު ﷺ އަށް ޞަލަވާތާއި ސަލާމް ލެއްވުމަށް އެދި ދުޢާކުރަން. މިޞަލަވާތާއި ސަލާމުގައި އެކަލޭގެ ފާނުގެ އާލު އަޞްޙާބުން ޝާމިލުކުރަން.
މިރަސްމިއްޔާތުގެ އިއްޒަތްތެރި ޝަރަފްވެރި މެހްމާން ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އޮނަރަބަލް ޢަބުދުﷲ ފަޔާޒް، މިނިސްޓަރ އޮފް އެޑިޔުކޭޝަން ޑޮކްޓަރ އިސްމާޢީލް ޝަފީޢު، ދައުލަތުގެ ބަންޑާރ ނާއިބު އަލްއުސްތާޛް އަޙްމަދު އުޝާމް، ކެބިނެޓްގެ ސެކްރެޓަރީ އަދި ބީއެމްއެލްގެ ޗެއަރ ޕާސަން އަލްފާޟިލް އަހްމަދު ޢަލީ ޙަބީބް، ކޮމިޝަނަރ އޮފް ޕްރިޒްންސް، ޕްރިޒްންސްގެ އެންމެހާ އިސް އޮފިސަރުން، ޕްރިޒްންސްގެ މަސައްކަތް ކުރައްވާ ހީވާގި މުވައްޒަފުން، އަދި މި މަސައްކަތުގަ ބައިވެރިވި އެންމެހާ ޤައިދީން.
السلام عليكم ورحمة الله وبركاته.
އާދެ! އެނގި ވަޑައިގަންނަވާނެ މިސްކިތެއް ބިނާ ކުރުމަކީ ވަރަށް މާތް ކަމެއް. އިސްލާމްދީން ގަބޫލުކުރާ ގައުމެއްގައި ކުރެވޭނެ އެންމެ މާތްކަމަކީ މިސްކިތެއް ބިނާ ކުރުން. ނަބީއްޔާ މިކަމަށް އިޝާރާތް ކުރައްވާ ޙަދީޘް ކުރައްވާފައިވޭ. މި ބިންމަތީގަ މިސްކިތެއް ބިނާކޮށް ﷲ ސުބުޙާނަހޫ ވަތަޢާލާ އަޅުކަންކުރެވި ނަމާދު ކުރެވޭ ނަމަ އެމީހަކަށް ﷲ ސުބުޙާނަހޫ ވަތަޢާލާ ސުވަރުގޭގައި ގަނޑުވެރެއް ބިނާކޮށްދެއްވާނެކަމަށް. މިހާ މަތިވެރިކަން ލިބިގެން ވާކަމެއް މިސްކިތެއް ބިނާކުރުމަކީ. އެނގިވަޑައިގަންނާވާނެ މިޖަލުގަ މީގެ ކުރީގަ ފުރުޞަތު އޮތްކަމެއް ނޫންމީ. ގައިދީންނަށާ ޖަލުގެ އޮފިސަރުންނަށް ނަމާދު ކުރެވޭނެގޮތް އިންތިޒާމް ވެގެން ދިޔައީ ރައީސުލްޖުމްހޫރިއްޔާގެ އެންގެވުމާއެކު ކޮމިޝަނަރ އޮފް ޕްރިޒްންސްގެ ވަރަށް ބޮޑު އިސްނެންގެވުމެއްގެ މަތިން. ތިޔަ އެންމެހާ ލޮބުވެތި އޮފިސަރުން ޖަލުގެ ގައިދީން މި މަސައްކަތް ކޮށްދެއްވި ކަމަށްޓަކައި އެންމެހާ ބެފުޅުންނަށް ވަރަށް ބޮޑަށް ޝުކުރުދަންނަވަން.
އަޅުގަނޑުގެ ދުޢާ އަކީ މިފަދަ މާތް މަސައްކަތްތައް ކުރިއަށް އޮތްތާނގައިވެސް އަޅުގަނޑުމެންގެތެރެއިން ފެނިގެން ދިއުން. އަޅުގަނޑުމެންނަކީ އިސްލާމް ދީނުގެ މަތިވެރި ހިދާޔަތުގައި ތިބެ ރަނގަޅު ގޮތުގައި މި ބިންމަތީގައި ދިރިއުޅެވޭނެ މަގު ތަނަވަސް ވާބައެއްކަމުގައި ﷲ ސުބުޙާނަހޫ ވަތަޢާލާ ލެއްވުން.
والسلام عليكم ورحمة الله وبركاته.