`

"ދިވެހި ސަޤާފީ ގޯތި" ހުޅުވުމުގެ  ރަސްމިއްޔާތުގައި  މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ދެއްކެވި ވާހަކަފުޅު

(29 އޮގަސްޓް 2024)

ﷲ ސުބުޙާނަހޫ ވަތަޢާލާއަށް ޙަމްދާ ޝުކުރުކުރަން. އަޅުގަނޑުމެންގެ ރަސޫލާ މުޙައްމަދު ރަސޫލުﷲ ﷺ އަށް  ޞަލަވާތާއި ސަލާމް ލެއްވުމަށް އެދި ދުޢާކުރަން. މިޞަލަވާތާއި ސަލާމުގައި އެކަލޭގެ ފާނުގެ އާލު އަޞްޙާބުން ޝާމިލުކުރަން.

އަޅުގަނޑުމެންގެ ފަސްޓް ލޭޑީ މެޑަމް ސާޖިދާ، ދިވެހިބާހާ ސަގާފަތާ ތަރިކާއާބެހޭ ވަޒީރު އަލްފާޟިލް އާދަމް ނަޞީރު ، ކޮމިޝަނަރ އޮފް ޕްރިޒްންސް، ކޮމިޝަނަރ އޮފް ޕޮލިސް، ކޮމިޝަނަރ ޖެނެރަލް އޮފް ކަސްޓަމްސް، ކޮންޓްރޯލާ ޖެނެރަލް އޮފް އިމިގްރޭޝަން، ޕާކިސްތާނުގެ ހައިކޮމިޝަނަރ، ދައުލަތުގެ އިސްވެރިން، ވަޑައިގެން ތިއްބެވި އެންމެހާ ޙާޟިރީން، ކަރެކްޝަނަލް ސަރވިސްގެ އެންމެހާ އޮފިސަރުން އަދި މިރަސްމިއްޔާތު ދުރާ ގާތުން ބައްލަވަމުން ގެންދަވާ އެންމެހާ ބޭފުޅުން. 

السلام عليكم ورحمة الله وبركاته.

އާދެ! ދިވެހިރާއްޖޭގެ ސަޤާފަތާ ސަގާފީ ހަރަކާތްތައް ދިރުވާ އާލާކޮށް މީހުންނަށް ދަސްކޮށްދީ އަދި ރައްޔިތުން ތެރޭގައި މިއަށް އަލުން ލޯބިޖެއްސުމަކީ ރައީސުލްޖުމްހޫރިއްޔާގެ ވަޢުދު ފުޅެއް. މިކަން ކުރުމަށްޓަކައި އަޅުގަނޑުމެން ކަރެކްޝަނަލް ސަރވިސްއިން ކުރެވިދާނީ ކޮންކަންތަކެއްތޯ ރައީސުލްޖުމްހޫރިއްޔާގެ އެންގެވުމާއެއްކޮށް އަޅުގަނޑުމެން ބަލަން ފެށިން މިދައުރު ފެށުމާއެއްކޮށް. އޭގެ ތެރެއިން ރައީސުލްޖުމްހޫރިއްޔާގެ ވަރަށް ސާފު ގައިޑެންސެއް އޮތް އަޅުގަނޑުމެންނަށް ގައިދީން ރީހެބިލިޓޭޓް ކުރުމުގެ ތެރޭގަ  މިހާރަށް ވުރެ ބޮޑަށް އޭގެތެރޭގައި ގައުމިއްޔަތު ހިމަނައިގެން ސަގާފަތް އޭގެތެރޭގައި ހިމަނާއިގެން ގައިދީންގެ ރީހެބިލިޓޭޝަން މަސައްކަތް ކުރިއަށް ގެންދެވޭނެގޮތްތައް އޮތްތޯބަލާ އެގޮތްތަކަށް ކުރިއަށް ގެންދިއުމަށް.  އަދުގެ ކޮމިޝަނަރ އޮފް ޕްރިޒްންސްގެ އިސްނެންގެވުމާއެކު ކަރެކްޝަނަލް ސަރވިސްގެ އޮފިސަރުން، އަދި މިތާގަ ތިބި ގައިދީން ޑެލިވަރކޮށްފަ މިވާ ސަގާފީ ވިލެޖަކީ އަޅުގަނޑަށް ހަނދާންވާ ގޮތުގައި މިރާއްޖޭގައި މިގޮތަށް ކުރެވޭ އެންމެބޮޑު އެއްމަސައްކަތަށް ވެގެން ދާނެ. އަދި ދެމެހެއްޓެނިވި ގޮތަކަށް މިކަން ކުރެވޭނެ ޕްލޭންތަކެއް އަޅުގަނޑުމެންގެ އެބައޮތް. ރައީސުލްޖުމްހޫރިއްޔާ ދެއްވާފައިވާ ގައިޑެންސާ އެއްގޮތަށް  އަޅުގަނޑުމެންނަށް މިތަނުގައި ކުރެވޭ މަސައްކަތަކީ ގައިދީންނަށް ދަސްކޮށްދީގެން  ދެމެހެއްޓެނިވި ގޮތެއްގައި ގައިދީން ކުރާ މާސައްކަތަކަށްވާނެކަމަށް. އަދި އެމަސައްކަތުގެ ތެރެއިން އާންމުދަނީ ލިބި އެއާންމުދަނީގެ ބައެއް ގައިދީންނަށް ސީދާ ލިބޭނެގޮތްތަކެއް ހޯދުން.

 ރައީސުލްޖުމްހޫރިޔާ އަދިވެސް ކަނޑައަޅުއްވާފައިވާ އާ ސިޔާސަތެއް، އަޅުގަނޑު މިއަދު އިޢުލާންކޮށްލާނަން.  ގައިދީންގެ ތެރެއިން ރީހެބިލިޓޭޝަންގެ މަސައްކަތުގަ ބައިވެރިވާ ކޮންމެ ގައިދީއަކު އެއީ އެމީހާ އިލެކްޓްރިކަލް އިންޖިނިއަރިންގ ދާއިރާއިން ކަމުގައިވިއަސް، ރޭނުމުގެ ދާއިރާއިންވިއަސް، ސަގާފީ މަސައްކަތުގެ ދާއިރާއިން ވިއަސް ، މަސައްކަތް އުނގެނުމަށް ނުވަތަ މަސައްކަތް ކުރުމަށް މަސައްކަތް ކުރާ ކޮންމެ ދުވަހަކީ، ޖަލުގަ މަސައްކަތްކުރާ ކޮންމެ ދުވަހަކީ އޭނަގެ ޖަލުހުކުމުން އެއްދުވަސް ކެނޑިގެންދާނެ ދުވަހެއްގެ ގޮތުގައި ހަމަޖެއްސުން. އެހެންވީމަ އަޅުގަނޑުމެން ގަވާއިދުތަކާ ގާނޫނުތަކަށް ގެންނަން ޖެހޭ ބަދަލުތައް ގެނެސް މިކަން ހަރުދަނާ ގޮތެއްގައި ގެންދެވޭނެ އުސޫލު ކަރެކްޝަނަލް ސަރވިސް އިން  ވަރަށް އަވަހަށް ކަނޑައަޅާފަ ހުރިހާ ގައިދީންނަށްވެސް އިއުލާން ކުރާނަން.

އަޅުގަނޑުމެންގެ ރައީސްގެ ގައިޑެންސަކީ ހުރިހާ ބޭފުޅުނަކީވެސް ޖަލުތަކުގައި މިތިބޭ ދުވަސްތަކުގެ ތެރޭގައި ރަނަގަޅު ފަންނުވެރި މަސައްކަތެއް ދަސްކޮށްގެން އާންމުދަނީ ލިބޭނެ މަގެއް ހޯދައިގެން މުޖުތަމައަށް އަނބުރާ އަވަހަށް ނިކުމެވޭނެ ބޭފުޅަކަށްވުން. އަޅުގަނޑުމެން ވިސްނުމެއް ނޫން ޖަލުތަކުގެ ތޭރިތަކުގެ ތެރޭގައި ގިނަދުވަސް ވަންދެން މީހުން ގެންގުޅުމަކީ. މިތަނަށް ވަނުމާއެކީ އެމީހާގެ އިސްލާހީ މަސައްކަތް ފެށި އެމީހާ ކުރަން ޖެހޭ ކަންތައްތައްކޮށް ބަރާބަރަށް ދަސްކުރަންޖެހޭ ކަންތައްތައް ދަސްކޮށްގެން މުޖުތަމައަށް އަނބުރާ ބޭނުންތެރި ދިވެއްސެއްގެ ގޮތުގައިގޮސް ރާއްޖެ ތަރައްގީ ކުރުމުގެ މަސައްކަތުގައި އުޅުން. އަޅުގަނޑުމެންގެ ރައީސުލްޖުމްހޫރިއްޔާ ތިބޭފުޅުންގެ ފަރާތުން އެދިލައްވާ  އެދިލެއްވުމަކީ. އަޅުގަނޑުމެން އިރާދަ ކުރެއްވިއްޔާ ކަރެކްޝަނަލް ސަރވިސްގެ ޕްރޮޓޮކޯލްތަކާ ކަރެކްޝަނަލް ސަރވިސްއިން މިހާރު ގެންގުޅުއްވާ ރިހެބިލިޓޭޝަން ޕްރޮގްރާމްތައް ބަދަލުކުރާނަން މިކަމަށް އެލައިން ކުރެވޭގޮތަށް.  މިތަނުން ތައްޔާރުކުރެވިގެންދާ މިއަދު ތިބޭފުޅުންނަށްވެސް ފެނިވަޑައިގަންނަވާނެ ކޮންމެވެސް ވަރަކަށް ގައިދީން ތައްޔާރު ކޮށްފަވާ ސަގާފީ އެއްޗެހިތައް. އަދި ރައްޖޭގައި ކުރީޒަމާނުގައި ގެންގުޅުނު ސާމާނުތައް. ފަންނުވެރިމުން އުފައްދަވާފައިވާ އުފެއްދުންތައް. މިއުފެއްދުންތައް ރާއްޖެއަށް ޒިޔާރަތް ކުރާ ފަރާތްތަކަށް ވިއްކޭނެ ގޮތް އަޅުގަނޑުމެން ހަދާނަން. މިޖަލުގެ ތެރޭގަވެސް އަދި އޭގެ އިތުރުން ރާއްޖޭގެ ނޭޝަނަލް އެއަރޕޯޓްގެ ޖާގައިގެ ތެރޭގަވެސް މިތަކެތި ވިއްކޭނެ ގޮތެއް ވޭތޯ އަޅުގަނޑުމެން މިދަނީ މަސައްކަތް ކުރަމުން. އެ ވިއްކާފަ ލިބޭ ފައިދާގެ ތެރއިން ބައެއް ގައިދީންނަށް ސީދާ މުސާރަ ނުވަތަ އުޖޫރައިގެ ގޮތުގަވެސް ލިބޭނެގޮތް އަޅުގަނޑުމެން ހަދާނަން.

އެހެންވީމަ އަޅުގަނޑުމެންގެ ވިސްނުމަކީ ކުރިއަށް އޮތްތާނގަ މިތަނުގަ ވަރަށް ހަރަކާތްތެރި މާހައުލެއްފެނި ޖަލުގެ ގައިދީންނަކީ ތަޅުލެވިގެން 24 ގަޑި އިރު ތިބޭ ބަޔަކަށް ނުވެ މަސައްކަތްތެރި އުފެއްދުންތެރި ބަޔަކަށްވެގެން ޖަލުން އަވަހަށް ނިކުމެ މުޖުތަމައުގެތެރެއަށްގޮސް އެމީހުންގެ އާއިލާގެ ކަންތައްތައް ބެލެހެއްޓުމުގައި މަސްއޫލުވެގެން ޒިންމާދާރު ދިވެއްސެއްގެ ގޮތުގައި އުޅޭތަން އަވަހަށް ފެނުން.

އެނގިވަޑައިގަންނާވާނެ ޖަލު ހިންގުމަކީ ވަރަށް ޚަރަދު ބޮޑުކަމެއް ދެންމެ ކޮމިޝަނަރ ފާހަގަ ކުރެއްވި ގޮތަށް ގާތްގަނޑަކަށް މަހެއްގެ މައްޗަށް 27000 ރުފިޔާ ބޮލަކަށް ޚަރަދުވޭ މިހާރު ޖަލު މިހިންގާ ނިޒާމުގެ ތެރެއިން. އަޅުގަނޑުމެން މިކަމަށް ދިރާސާކޮށްފަ މިހާރު ރައީސުލްޖުމްހޫރިއްޔާ ނިންމަވާފައިވާނެ ރާއްޖޭގަ އެއް ސެންޓްރަލް ޖަލު ގާއިމުކުރުމަށް. މިހާރު ހިއްކެމުންދާ ސަރަހައްދުގެ ތެރެއިން އަޅުގަނޑުމެންނަށް މާލެއާކާރިން ކުރިއަށް އޮތްތާނަގައި ބުރިޖަކުން ގުޅޭތަނަކުން އަޅުގަނޑުމެނަށް ސެންޓްރަލް ޖަލެއް މިހާރުވަނީ ކަނަޑައެޅިފަ. އެތަން ހެދި 03 އަހރުތެރޭގައި އިރާދަކުރެއްވިއްޔާ ޚިދުމަތަށް ގެނައުމުގެ މަސައްކަތް އަޅުގަނޑުމެން މިހާރި މިފަށައިގެން ކުރިއަށް ދަނީ. އެހިސާބުން ބޮލަކަށް ޖެހޭ ޚަރަދު ގާތްގަނޑަކަށް 17000  ރުފިޔާ އަށް ކުޑަކުރެވިގެންދާނެކަމަށް އަޅުގަނޑުމެންގެ މިހާރުގެ ހިސާބުތަކުން ދައްކަނީ.

އެހެންވީމާ އަޅުގަނޑުމެން މި އުއްމީދުކުރާ ގޮތަކީ ޖަލުތަކަށް ކުރެވޭ ޚަރަދުތއް ކުޑަކޮށް ޖަލުތަކުން ނެރެވޭ ނަތީޖާ އިތުރުކުރުން. ޖަލުތަކުން މީހުން އވަހަށް ރީހެބިލިޓޭޓް ކުރެވޭނެ ގޮތްތަށް ހޯދުން. ޖަލުތަކުގައި އަޅުގަނޑުމެން ދިވެހި ރައްޔިތުން ބޭކާރުގޮތުގަ މިކުރާ ޚަރަދު ކުޑަކުރުން. ހަމައެއާއެކު ކޮމިޝަނަރ ފާހަގަ ކުރެއްވި ފަދައިން އޮފިސަރުންނަށް ލިބެންޖެހޭ އެންމެ ރަނަގަޅު ބޯހިޔާވަހިކަމާ އަދި ވެލްފެއަރގެ އެހެނިހެން ކަންކަން ހަމަޖެއްސުމަކީ ރައީސުލްޖުހޫރިއްޔާ ވަރަށް އިސްކަން ދެއްވާ ކަމެއް. އަޅުގަނޑުމެން އިރާދަކުރެއްވިއްޔާ މި ޒަޢާމަތް ނިމިގެންދާނި މިކަމަށް ހައްލެއް ހޯދާފަ.

އާދެ! އަޅުގަނޑު ވަރަށް ބޮޑަށް ޝުކުރުއަދާ ކުރަން ފަސްޓްލޭޑީ އަޅުގަނޑުމެންނާއެކުގަ މިވަގުތުކޮޅު ހޭދަކޮށްލުމަށް ވަޑައިގެން ދެއްވިކަން. އަޅުގަނޑަށް އެނގޭ ވަރަށް ބުރަކޮށް އުޅުވަމުން ހަމައެއާއެކު ރޭގަ ދަތުރުފުޅު ކުރައްވާފަ މިހާ ހެނދުނާ މިތަނަށް ވަޑައިގެންނެވުމަކީ ފަސޭހަކަމެއްނޫން. އެހެންނަމަވެސް މިކަހަލަ އިޖްތިމާއީ ކަންކަމަށް ކަމނާ ހިތުގަ އޮތްލޯބި ފެނިގެން ދިޔަ ކަމެއް މިކަމަކީ. އަޅުގަނޑުމެން މިމުއައްސަސާގެ ފަރާތުން އަދި މިނިސްޓްރީގެ ފަރާތުން ވަރަށް އިޚްލާޞްތެރިކަމާއެކު ޝުކުރު އަދާކުރަން މެޑަމް އަޅުގަނޑުމެންނާއެކު ތިވަގުތުކޮޅެއް ހޭދަކޮށްލެއްވި ކަމަށްޓަކައި. އަދި އަޅުގަނޑު ދަންނަވާލަން މިއަދު އެއްއިވެންޓް ހުށަހަޅާދިނީ އަޅުގަނޑުމެންގެ މިޖަލުގެ ގައިދީން. އެބޭފުޅުންނަށް ލިބިގެންދިޔަ ވަރަށް ބޮޑު އުފަލަކަށްވާނެ މެޑަމްގެ ކުރިފުޅުމަތީގަ އެބޭފުޅުންގެ މަސައްކަތް މިއަދު ދައްލެވުނީމަ. އެހެންވީމަ މެޑަމް ވަޑައިގެން ދެއްވިކަމަށްޓަކައި މިހުރިހާ ބެފުޅުންގެ ނަމުގައި އަދިވެސް އެއްފަހަރު ޝުކުރު އަދާކުރަން.

އާދެ! އަޅުގަނޑުގެ ދުޢާއަކީ އަޅުގަނޑުމެން މިކުރާ މަސައްކަތުގައި މާތްﷲ ސުބުޙާނަހޫ ވަތަޢާލާ ބަރަކާތް ލެއްވުން. އަދި އަޅުގަނޑުމެންގެ ޖަލުތަކުގެ ތެރޭގައި މިތިއްބެވި ބޭފުޅުންނަށް އެބޭފުޅުންގެ ހިތްތަކަށް ގައުމީ ލޯތްބާއި ވަޠަނީ ރޫޙް ވައްދަވައި އެބޭފުޅުންނަކީ ގައުމަށް ފައިދާހުރި ބައެއްގެ ގޮތުގަ އަވަހަށް މާތް ﷲ ސުބުޙާނަހޫ ވަތަޢާލާ ލެހެއްޓެވުން.

 والسلام عليكم ورحمة الله وبركاته.