`

"ރައްކާ" ރޯޑް ސޭފްޓީ ޕްރޮގްރާމަށް 10 އަހަރު ފުރުން ފާހަގަ ކުރުމަށް ފުވައްމުލައް ސިޓީ ގައި ބޭއްވި ރަސްމިއްޔާތުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ދެއްކެވި ވާހަކަފުޅު

 (11 އޮގަސްޓް  2024)

ރައްކާ ތެރިކަމާ އަމާންކަން މިންވަރު ކުރެއްވި ﷲ ސުބްހާނަހޫ ވަތަޢާލާ އަށް ހަމްދާއި ޝުކުރުކުރަން. ރައްކާތެރިކަމާ އަމާންކަން ކަށަވަރުކުރާނެ ގޮތްތަކުގެ މާތް މިސާލު އަޅުގަނޑުމެންނަށް ދެއްކެވި   މާތް ރަސޫލާ މުޙައްމަދު ﷺ ސަލަވާތާއި ސަލާމް ލެއްވުންއެދި ދުޢާކުރަން. މި ސަލަވާތާއި ސަލާމުގައި އެކަލޭގެފާނުގެ އާލުންނާއި އަސްޙާބުން ޝާމިލުކުރަން.

ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާގެ ނާއިބު އަލްއުސްތާޛް ޙުސެއިން މުޙައްމަދު ލަޠީފް ކަމިޝަނަރ އޮފް ޕޮލިސް އަލީ ޝުޖާޢު، ފުވައްމުލަށް ސިޓީގެ މޭޔަރު، ފުވައްމުލަކު އަތޮޅުގެ ދާއިރާތަކުގެ ރައްޔިތުން މަޖިލީހުގެ އިއްޒަތްތެރި މެމްބަރުން، މިރަސްމިއްޔާތުގަ ބައިވެރި ވަޑައިގަންނަވާ އެއްމެހާ ޢިއްޒަތްތެރިން.

އައްސަލާމް އަލައިކުމް ވަރަހްމަތުﷲ ވަބަރަކާތުހޫ.

ދެ! އެންމެ ފުރަތަމަވެސް އަޅުގަނޑުމެން ދަންނަވާލި ދަންނަވާލުމަށް ނާއިބު ރައީސް މި ރަސްމިއްޔާތު ތަކުގައި ބައިވެރިވެ ވަޑައިގެންދެއްވަން އެންމެ ފުރަތަމަ އަދި އަލަށް ފުވައްމުލަކަށް ވަޑައިގެން ދެއްވި ކަމަށްޓަކައި ރައީސުލްޖުމްހޫރިއްޔާގެ ނާއިބަށް ވަރަށް ބޮޑަށް ޝުކުރު އަދާކުރަން.

އާދެ! ރައްކާ ރޯޑް ޝޯއަކީ ވަރަށް މާތް 4 މަގުޞަދެއް ޙާސިލު ކުރުމަށްޓަކައި ދިވެހި ފުލުހުން އިސްނަންގަވައިގެން ހިންގަވާ ޕްރޮގްރާމެއް. މީގެ ތެރޭގައި އެކްސިޑެންޓް މަދު ކުރުމާއި އެކްސިޑެންޓުންވާ ގެއްލުން ކުޑަ ކުރުމާއި ގަވާއިދާ ޤާނޫނަށް މީހުން އަހުލުވެރި ކުރުވުމާއި އަދި އޭގެ އިތުރުން ނަމޫނާ މަގުތަކަކަށް މަގުތަށް ހެދުން ހިމެނޭ. މި މަގުސަދުތައް ޙާސިލުވާނީ އަޅުގަނޑުމެން އެންމެން އެކީ އެކަށްޗަކަށް މަސައްކަތްކޮށްގެން.  މިކަމުގަ އަޅުގަނޑުމެންނަށް ޚާއްޞަ އެހީ ތެރިކަންދޭ ވަރަށް ގިނަ ފަރާތްތަކެއް މިއަދު މިފާހަގަ ކުރެވިގެންދިޔައީ.

ރައީސުލްޖުމްހޫރިއްޔާ 17 ނޮވެމްބަރގައި ހުވާ ކުރެއްވި ދުވަހު ވިދާޅުވި އަޅުގަނޑުމެން އުމުރާނީ ތަރައްގީއާ އެއްވަރަށް އަޅުގަނޑުމެންގެ ސިކުޑިތައްވެސް ތަރައްގީ ކުރެވެންޖެހޭކަމަށް ވިދާޅުވި. އަދި އެމަނިކުފާނުގެ ޒަޢާމަތުގައި އެމަސައްކަތް ކުރައްވަމުން ގެންދަވާނެކަން. އަޅުގަނޑު ދެކޭ ގޮތުގައި ސަލާމަތާ ރައްކާތެރިކަން ކަށަވަރު ކުރުމުގެ ދާއިރާއިން މީހުންގެ ސިކުނޑިތައް ތަރައްގީކޮށް އިތުރަށް މިކަމުގެ ތެރެއަށް ވެއްދުމަށް ކުރެވޭ ބުރަ މަސައްކަތެއް ރައްކާ ރޯޑު ޝޯއަކީ. މިކަމަށްޓަކައި މިމަސައްކަތް ކުރައްވާ ދިވެހި ފުލުހުންގެ އިސްފަރާތްތަކާ އަދި  މިފަދަ ޕްރޮގްރާމުތަކަށް އެއްބާރުލުން ދެއްވާ އެއްމެހާ ފަރާތްތަކަށް ވަރަށް ބޮޑަށް ޝުކުރު އަދާކުރަން.

ޕްރޮގްރާމުގެ ދެވަނަ ބައި މިއަދު ފެށިގެންދާއިރުގަ އަޅުގަނޑު ގަބޫލުކުރަނީ މީގެ ހަގީގީ ކާމިޔާބަކަށްވާނީ ޕްރޮގްރާމުގަ ވީހާވެސް ގިނަ ބައިވެރިން ޕްރޮގްރާމުގަ ސީދާ ބައިވެރިވުމާ އަދި ނުސީދާ ގޮތެއްގަ ވައިވެރިވެގެން މީގެން މާންފާ ލިބިގެން ދިއުން. އަދި މީގެ ނަތީޖާއެއްގެ ގޮތުން މިހާރަށްވުރެ އަމާން މަގުތަކެއް ފުވައްލަށް ސިޓީން ފެނިގެން ދިއުމަކީ އަޅުގަނޑުމެން އެންމެން ދެކެން ބޭނުންވާ ދުވަސް.

ރާއްޖޭގެ ދާޚިލީ ސަލާމަތާއި ރައްކާތެރިކަން ކަށަވަރު ކުރުމަކީ އަދުގެ ސަރުކާރުގެ ވަރަށް މުހިންމު އެއް އަމާޒު. މިގޮތުން އަޅުގަނޑުމެން ވަރަށް އިސްކަން ދީގެން ކުރަމުން އަންނަ ތިން މަސައްކަތެއް އެބަވޭ. އޭގެ ތެރޭގަ ދިވެހިރާއްޖެ ޑްރަގުގެ ވަބާއިން އެއްކޮށް ސަލާމަތް ކުރުމާއި ގޭންގު ހަދައިގެން ކުށްތައް ކުރުމުން ރާއްޖެ އެއްކޮށް މިންޖު ކުރުމާއި އަދި ގަވާއިދާ ޚިލާފަށް އުޅެމުންދާ ބިދޭސީންގެ މަސައްލައަށް ދާއިމީ ހައްލު ހޯދުމަކީ އެންމެ އިސްކަންދީގެން ކުރުވަމުން އަންނަ މަސައްކަތެއް. މިކަންކަން މިގޮތަށް ކުރަމުންދާއިރު އަޅުގަނޑުމެން ހުރިހާ ރައްޔިތުން މިކަމަށް އެއްބާރުލުންދީގެން މެނުވީ މީގެ ހަގީގީ ނަތީޖާއެއް ނުއެއް ފެންނާނެ. މިފަދަ ކޮންމެ ކަމެއް ކުރަމުން އަންނަ އިރުގަ މިހާރު މިއޮންނަ ބިޒިނަސް އޭޒް ޔޫޝުއަލް ބަދަލުވާންޖެހޭ. މިހާރު މީ އާންމު ކަމެއްކަމުގަ ދެކޭ ކަންކަން ބަދަލުވާންޖެހޭ. މިހާރު މީ އޯކޭ ކަމެއްކަމަށް ދެކޭ ކަންކަން ބަދަލުވާންޖެހޭ. އަޅުގަނޑުމެން ޓޮލެރޭޓް ކުރަމުން އައި އައުން ކޮށްމެވެސް ވަރަކަށް ޓޮލެރޭޓް ނުކުރަން ފަށަންޖެހޭ. ގިނަ ގާނޫނުތައް ތަންފީޒް ވެގެން އަންނަ އިރުގަ ބައެއްމީހުނަށް އުނދަގޫވާނެ. އެއީ މިހާތަނަށް ގާނޫނުތައް ތަންފީޒްނުވެ ދާދިއުމުން ކޮންމެވެސް ކަހަލަ ފައިދާތަކެއް ނުވަތަ މަންފާ ތަކެއް ލިބެމުން އައިބަޔަކުވެސް ތިބެދާނެ. އެހެންވީމަ ކޮންމެފަހަރަކު ގާނޫނު ނެގެހެއްޓުމަށް ކުރާ މަސައްކަތުން ކޮންމެވެސް ވަރަކަށް ކޮންމެވެސް ބަޔަކަށް ތަކުލީފެއް އައުމަކީ ވަގުތީގޮތުން އަޅުގަނޑުމެން ތަހައްމަލު ކުރަންޖެހޭ ކަމެއް.

ކުރީ ޒަމާނުގަ އަޅުގަނޑުމެން ކުޑައިރުގަ އަޅުގަނޑުމެން ރަށު އޮފީހަށް ކަމެއްގަ މައްސަލަޖެހިގެން ހާޒިރުކުރާއިރުގަ ގެއަށް ގުޅާފަބުނީމަ މަންމަ އަންނާނެ އިލޮށިފަތި ހިފައިގެން. އެއީ ރަށުއޮފީހުން ނިމިގެން އަދި ދެތިންފަހަރު އިލޮށިފަތިން އަޅާލީމަ އަޅުގަނޑުމެންނަށް އޭގެ ރާހަތު ލިބިގެންދަނީ. މިހާރު އެޒަމާން ބަދަލު ވެއްޖެ. މިހާރު ފުލުސްއޮފީހަށް ކުއްޖާ ހާޟިރުކުރިވާހަކަ އެނގުނީމާ މަންމެން ދާނީ ދެތިން ކޮމިޝަނަށް ފުރަތަމަ. އެއީ އެކުއްޖާގެ ކޮންމެވެސް ޙައްގެއް ނިގުޅައިގަތް ކަމަށް ބަލާފަ. އަދި ވީނުވީއެއްވެސް ޔާގީން ނުވާނެ ގިނަފަހަރަށް. މީ އަޅުގަނޑުމެން ސިކުނޑިތަކަށް އައިސްއަ ހުރި ބަދަލު. މި ބަދަލު އަނބުރާ ކުރީގަ އޮތްގޮތާ ގާތަށް ރުޖޫއަ ވާންޖެހޭ. ކޮންމެ ފުލުހަކު ނުވަތަ ކޮންމެ ޕޮލިސް އެކްޝަން އަކީ ތިމާ މީހާގެ ހައްގެއް ނިގުޅައިގަތުމެއްކަމަށް ބެލުމަކީ ވަރަށް ބޮޑު ގޯހެއް އެއީ. އަޅުގަނޑު ނުދަންނަވަން ކޮންމެ ޕޮލިސް އެކްޝަނަކީ ހުރިހާ ގޮތަކަށް ކަށަވަރުވެސް ވެފައިވާ ކަމެއްކަމަކަށް.  އެހެންވެގެން ކޮމިޝަންތައް ހުންނަނީވެސް. އެހެންނަމަވެސް އަޅުގަނޑުމެން އަޅުގަނޑަށް ހީވަނީ މިހާރު ތަންކޮޅެއް ބޮޑަށް އެބިއުޒް ވާހިސާބަށް ގޮއްސަހެން މިތިބީ. އަޅުގަނޑުމެން ގަބޫލުކުރަން އެބަޖެހޭ ގާނޫނު ނެގެހެއްޓުމަށްޓަކައި  ކޮންމެވެސް ވަރެއްގެ އުނދަނގޫތަކެއް އަންނާނެކަން. އަދި ގާނޫނު ނަގަހައްޓަން ކުރާ ކޮންމެ މަސައްކަތަކީ ކޮންމެވެސް އެކަކު ގާނޫނާ ޚިލާފުވެގެން ކުރާ މަސައްކަތެއްކަން ގަބޫލުކުރަން އެބަޖެހޭ. އަދި ގާނޫނާ ޚިލާފުވާ ކުދިންނަށް ނުވަތަ މީހުނަށް ފިޔަވަޅުތަކެއް ނޭޅި އެކުއްޖާ އިސްލާޙް ނުކުރެވޭނެކަންވެސް އަޅުގަނޑުމެން ގަބޫލުކުރަން އެބަޖެހޭ. ނުކިއްސަރު މަގަކުން ދާކުއްޖާއަށް އެކުއްޖާއަށް ޕްރޮޓެކްޝަންދޭން، އެކުއްޖާ އިތުރަށް ރައްކާތެރިކުރުމުގެ ނިޔަތުގައި އަޅުގަނޑުމެންނަށް ގިނަފަހަރަށް މިކުރެވޭ މަސައްކަތަކީ އެކުއްޖާ ގޯހުގެ ތެރެއަށް އިތުރަށް ޕުޝް ކުރުން. މި ސަގާފަތް އަޅުގަނޑުމެން ބަދަލުކުރަން އެބަޖެހޭ. މިސަގާފަތް ބަދަލުކުރަން އެންމެން އެކީ މަސައްކަތް ކޮށްފިނަމަ ﷲގެ އިރާދަފުޅާއެކު އަދުގެ ރައީސުލްޖުމްހޫރިއްޔާގެ ޒައާމަތުގަ އަޅުގަނޑުމެންނަށް އަމާން ގައުމެއް އަނބުރާ އިއާދަ ވެގެންދާނެ.

އަޅުގަނޑުމެން އެއްވެސް މީހެއް ގަބޫލެއް ނުކުރާނެ އަޅުގަނޑުމެންގެ ހުރިހާ ތަނެއް މިއޮތީ އެންމެ އަމާންކޮށް ކަމަށް. އޭގެ ތެރޭގައި މަގުމަތިވެސް ހިމެނޭހެން. މި އަމާންކަން ބެނުންވާނަމަ ކޮންމެވެސް ވަރެއްގެ އެއްޗެހިތަކެއް  ދޫކުރަންވެސް އަޅުގަނޑުމެން ޖެހޭނެ.  އެ ދޫކުރާ ދޫކުރުންތަކަކީ އަޅުގަނޑުމެން މިހާރު މި ގަބޫލުކޮށްގެން ތިބި ބައެއް އާދަކާދަތައް. މީގެން އަޅުގަނޑުމެން އެބަޖެހޭ ނެއްޓި ކުރީގަ އޮތް ބައެއްކަހަލަ ރަނގަޅު ސަގާފަތްތަކަށް އިއާދަވާން.

އާދެ! މަގުތަކުގެ އަމާންކަން ކަށަވަރުކުރަން ބަލާއިރުގަ ފަރުދީ ޒިންމާ އޭގެ ތެރޭގައި އެބައޮތް. އިންސިޓިޓިއުޝަނަލް ޒިންމާ އޭގެ ތެރޭގައި އެބައޮތް. އަޅުގަނޑުމެން ބަލާނަން  އިންސިޓިޓިއުޝަނަލް ޒިންމާ ފުރިހަމައަށް އަދާކުރެވޭތޯ. ހަމަ ޔަގީނުންވެސް  ދިވެހި ފުލުހުންގެ ފަރާތުން އަޅުގަނޑަށް ޔަގީންކަން ތިޔަ އެންމެހާ ލޮބުވެތި ރައްޔިތުންނަށް އަރުވާނަން. ހަމަ އެހެންމެ އަޅުގަނޑުމެން އެބަ ބޭނުންވޭ ހުރިހާ ރައްޔިތުންގެ ފަރާތުން އެބޭފުޅެއްގެ ފަރުދީ ޒިންމާ އެބޭފުޅަކުވެސް އަދާ ކުރާނެކަމުގަ ޔަގީކަން. އަދި އެކަމަށް މިއަދު އަޒުމް ކަނޑައަޅަންވެސް އެބަޖެހޭ. ކަލެކްޓިވްލީ އަޅުގަނޑުމެން ދެބައިމީހުން ގުޅިގެން ކުރާމަސައްކަތުން ރަޢްޖޭއަކީ މާތް ﷲ އިރާދަފުޅާއެކު އަމާން ތަނަކަށް ބަދަލުވެގެންދާނެ. ރައްކާ ޝޯއަކީ މިގޮތުން ކުރެވޭ ބުރަ އެއް މަސައްކަތް.  އިންސިޓިޓިއުޝަނަލީ ކުރެވޭ މަސައްކަތެއް. ނަމަވެސް ފަރުދީގޮތުން މީހުން ޒިންމާ ކުރުމަށްޓަކައި ކުރެވޭ މަސައްކަތް.

އަޅުގަނޑު ނިންމާލުމުގެ ކުރިން އަދިވެސް އެއްފަހަރު ރައީސުލްޖުމްހޫރިއްޔާގެ ނާއިބު އަލްއުސްތާޛް ޙުސެއިން މުޙައްމަދު ލަޠީފް މި ރަސްމިއްޔާތު ޝަރަފްވެރިކޮށް ދެއްވުމަށްޓަކައި ބައިވެރިވެވަޑައިގަންނަވާ ކަމަށްޓަކައި ވަރަށް އިޚްލާޞްތެރިކަމާއެކު ޝުކުރުދަންނަވަން ސަރ.

އާދެ! އަޅުގަނޑު އެދެނީ މިފަދަ ގިނަ ޕްރޮގްރާމްތަކެއް ފުލުހުން އިސްނަންގަވައިގެން އަދި ރަށް ރަށުގެ ކައުންސިލްތަކުން އިސްނަންގަވައިގެން އަޅުގަނޑުމެންގެ މުޅި ކުށުގެ މާހައުލަށް އެޑްރެސްކުރުމަށްޓަކައި ކުރިއަށް އޮތްތާނގަވެސް ބޭއްވުން. މީގެ ސަބަބުން ގިނަ ރައްޔިތުން އެވެއަރވެ ކުށުގެ މާހައުލުން ދުރަށް އަޅުގަނޑުމެން މުޖުތަމައު އޮތްގޮތަށް ދިއުމަކީ އަޅުގަނޑުމެން އެދޭ ދުވަސް.

އަޅުގަނޑުގެ ދުޢާއަކީ އަޅުގަނޑުމެން މިކުރާ މަސައްކަތުގައި މާތް ﷲ ސުބުޙާނަހޫ ވަތަޢާލާ ބަރަކާތްލެއްވުން. އަދި ރާއްޖެއަކީ އަބަދުވެސް އަމާންތަނެއްގެ ގޮތުގައި އެކަނލާގެ ލެހެއްޓެވުން.

ކުރިއަށް ދިވެހި ގައުމު.   

ވައްސަލާމު އަލައިކުމް ވަރަޙްމަތުﷲ ވަބަރަކާތުހޫ.