ވަކި މީހަކު އިސްތިސްނާނުކޮށް ޤާނޫނީ ފިޔަވަޅު އެޅުއްވުމަކީ ރައީސުލްޖުމްހޫރިއްޔާ ޑރ. މުއިއްޒު ވަރަށް އިސްކަންދެއްވާ ކަމެއް ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، ފައިސާ ލޯންޑަރކުރާކަމަށް ޝައްކުކުރެވޭ މައްސަލައެއް ދިވެހި ފުލުހުންގެ ޚިދުމަތުން ތަހުގީގުކުރަން ފަށާފއިވާކަން ހާމަކުރައްވާ ކުރެއްވި އެކްސް ޕޯސްޓެއްގައެވެ.
މިނިސްޓަރ ވިދާޅުވީ ފިޔުލް ސަޕްލައި މޯލްޑިވްސް، އެފްއެސްއެމްގެ މުވައްޒަފުންތަކެއް އެކުންފުނީގެ ތެލުން ވައްކަންކޮށް، އޭގެއިން ލިބޭ ފައިސާ ލޯންޑަރ ކުރަމުންދާ ކަމަށް ޝައްކު ކުރެވޭ މައްސަލައެއް ދިވެހި ފުލުހުންގެ ޚިދުމަތުން ތަހުގީގު ކުރަމުންދާ ކަމަށެވެ. އަދި މި މައްސަލާގައި މިހާތަނަށް 10 މީހުންނާއި 2 ގެއެއް އަދި ތެޔޮއުފުލާ 2 ބާޖު ފުލުހުންގެ ޚާއްސަ ޓީމުތަކުން ބަލައި ފާސްކޮށްފައިވާ ކަމަށްވެސް މިނިސްޓަރ ވިދާޅުވިއެވެ.
މި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުން ހޯދާފައިވާކަން ފާހަގަކުރައްވާ މިނިސްޓަރ ވަނީ މި މައްސަލައިގެ ތަހުގީގު ކުރިއަށްދާވަރަކުން ފުލުހުންގެ ފަރާތުން މައްސަލައާގުޅޭ އިތުރު ތަފްސީލު ހާމަކުރައްވާނެ ކަމަށް ވިދާޅުވެފައެވެ.
އަދި މިފަދަ މައްސަލަތައް ފާހަގަކޮށް، ފުރިހަމައަށް އަވަހަށް ތަހުގީގުކޮށް، ވަކި މީހަކު އިސްތިސްނާނުކޮށް ޤާނޫނީ ފިޔަވަޅު އެޅުއްވުމަކީ ރައީސުލްޖުމްހޫރިއްޔާ ޑރ. މުއިއްޒު ވަރަށް އިސްކަންދެއްވާ ކަމެއް ކަމަށްވެސް މިނިސްޓަރ ވިދާޅުވިއެވެ.