911 އަށް ހުށައަޅާ މައްސަލަތައް ކަމާގުޅުން ހުރި ހުރިހާ އިދާރާތަކަށް ވަގުތުން އެ މަޢުލޫމާތު ފޯރުކޮށްދެވޭނެ ކަމަށް ދާޚިލީ ސަލާމަތާ ފަންނިއްޔާތާބެހޭ ވަޒީރު އަލީ އިޙުސާން ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ކުއްލި ހާލަތްތަކުގައި ރާއްޖޭގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭގޮތް ހަމަޖެއްސުމަށްޓަކައި ތައާރަފްކުރި އެމަޖެންސީ ސަރވިސް ހޮޓްލައިން "911" އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ މިރެއަކީ ދިވެހިރާއްޖެ ރަންއަކުރުން ފަވާލެވޭނެ ރެއެއް ކަމަށާއި ރައީސް ޑރ. މުޢިއްޒުގެ ވެރިކަމުގެ ވަރަށް ކުރީކޮޅުގައި މިފަދަ ނޭޝަނަލް އެމަޖެންސީ ކޯލް ސެންޓަރެއްގެ މުހިންމުކަން އެނގިވަޑައިގަތް ކަމަށެވެ.
އެވަގުތުން ފެށިގެން މި ޚިދުމަތް އެއް ނަންބަރެއްގެ ޒަރިއްޔާއިން ރައްޔިތުންނަށް ދިނުމަށް ރައީސް ނިންމެވިކަން ފާހަގަކުރައްވާ މިނިސްޓަރ ވިދާޅުވީ ކެބިނެޓުން މި މަސައްކަތް ކުރުމަށް ނިންމުމުން ރައީސް ވަނީ ސަލާމަތީ ޚިދުމަތްދޭ މުއައްސަސާތަކާއި ހަވާލުވެތިބި ވުޒާރާތަކަށް މި ޚިދުމަތް ތަޢާރަފްކުރުމަށް އިރުޝާދު ދެއްވި ކަމަށެވެ.
މިނިސްޓަރ ވިދާޅުވީ މި ޚިދުމަތްދޭން ނިންމީ ފުލުހުންގެ މުއައްސަސާގައި މި ޚިދުމަތް ގާއިމްކޮށް އަދި މި ޚިދުމަތް ގާއިމްކުރެވިގެން އަންނައިރު ފުލުހުންގެ ޚިދުމަތާއި، އެމްބިއުލާންސްގެ ޚިދުމަތުގެ އިތުރުން ކޯސްޓްގާޑް، ފަޔަރ އެންޑް ރެސްކިޔު ސަރވިސްގެ ޙިދުމަތްވެސް 911 ނަންބަރުގެ ތެރެއިން ރައްޔިތުންނަށް ލިބިގެންދާ ގޮތަށް ކަމަށެވެ.
"911 އިޚްތިޔާރުކުރި އިރު ވަރަށް ބޮޑަށް ބެލިން އޭގެ ޒާތުގަ ޕްރޮމޯޓްވަމުން ކުރިއަށްއޮތް ތަނުގަވެސް އަންނާނެ ނަންބަރެއް ސެލެކްޓްކުރުން. އެގޮތުން އަޅުގަނޑުމެންނަށް އެކިއެކި މީޑިއާތަކުގެ ޒަރިއްޔާއިންވެސް ފެންނަ އެއް ނަންބަރަކީ 911. އެހެންކަމުން އަޅުގަނޑުމެން ނިންމީ އެންމެ ފަސޭހަ ގޮތަކީ އަދި ގިނަ ރައްޔިތުންނަށް ހަނދާނުގައި ބަހައްޓަންވެސް ފަސޭހަވާނީ މިފަދަ ނަންބަރަކާއިގެން ކުރިއަށްދިޔައީމަކަން. ވަޒީރު"
މިއަދު މި ޚިދުމަތް ތަޢާރަފްވެގެން މިއައީ އެންމެ ބޭނުންވާ ފުރިހަމަ ފެންވަރެއްގައި ނޫން ކަމަށާއި އެހެންނަމަވެސް ރައްޔިތުންނަށް ބޭނުންވާ ފެންވަރަށް މިޚިދުމަތް މިއޮތީ ފެށިފައި ކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކަމާގުޅޭ ހުރިހާ އިދާރާއެއް ގުޅިގެން މި ޚިދުމަތް އިތުރަށް ފުޅާކޮށް ރައްޔިތުންނަށް މިއައްވުރެ ފުރިހަމަ ޚިދުމަތްތަކެއް ފޯރުކޮށްދިނުމުގެ މަގު ހޯއްދަވައިދެއްވާނެ ކަމަށެވެ.
އެގޮތުން ކޮމިއުނިކޭޝަން ސިސްޓަމްތައް އެޑްވާންސްކޮށް ޖީއައިއެސް މެޕްކުރެވޭނެ ނިޒާމަކަށް ބަދަލުކޮށް ޑިސްޕެޗް ސިންކްނޮރައިޒް ވާގޮތަށް ކުރިއަށް އޮތްތަނުގައި ހައްދަވައިދެއްވާނެ ކަމަށްވެސް މިނިސްޓަރ ވިދާޅުވިއެވެ.
911 ކޯލް ސެންޓަރުގެ ކެޕޭސިޓީ އިތުރުކުރައްވާނެކަން ފާހަގަކުރައްވާ މިނިސްޓަރ ވަނީ ރާއްޖެއިންނާއި އަދި ރާއްޖެއިން ބޭރުން ތަމްރީނުގެ ފުރުސަތުތައް މުވައްޒަފުންނަށް ފަހިކޮށްދެއްވާނެ ކަމަށް ވިދާޅުވެފައެވެ.
މިނިސްޓަރ ވިދާޅުވީ ބޮޑު ހާދިސާއެއް މެދުވެރިވެއްޖެނަމަ އެކަމަށް ޖަވާބުދާރީވާ ފަރާތަކީ ލޯއެންފޯސްމެންޓްގެ ފަރާތުން އެ ކޯލް ނަގާ ފަރާތްކަމުން އެ ފަރާތަކަށް އިތުރަށް ދޭންޖެހޭ ޓެކްނިކަލް ތަމްރީނުތައްވެސް ކުރިއަށް އޮތްތަނުގަ ދެމުންގެންދާނެ ކަމަށެވެ.
މިނިސްޓަރ ވަނީ 911ގެ ޚިދުމަތުގެ ފެންވަރު ދާނީ ދުވަހެއް ދުވަހަކަށް ރަނގަޅުވަމުން ކަމަށާއި ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން މި ޚިދުމަތް ލިބިގެން އަންނައިރު މި ޚިދުމަތް ރައްޔިތުންނަށް ލިބޭނީ ފުރިހަމައަށްކަން ފާހަގަކުރައްވާފައެވެ.
މިނިސްޓަރ ވަނީ އާއްމުންނާއި ގުޅިފައިވާ މިފަދަ މުހިންމު ޚިދުމަތެއް، ނަހަމަ ގޮތުގައި ބޭނުން ނުކުރުމަށް އިލްތިމާސްކުރައްވާފައެވެ.